Me takkar deg, Gud, for alle gode gåver. Takk for nåden du har gitt oss i Jesus Kristus, takk for det heilage, levande ordet ditt, takk for den kristne fellesskapen og for fred og fridom.
Me ber for forsamlinga vår. Bevar oss i trua på deg, og hjelp oss til å halda fast på ordet ditt. Gi oss frimod og styrke til å tene deg i kvardagen, og lei oss til søkande menneske. La kjærleiken din prega liva våre, og la einskapen me har i deg bli synleg. Gi oss givarglede og tålmod i bønnetenesta.
Me ber for born og unge og for barne- og ungdomsarbeidet vårt. Du ser søndagsskulen, KreAktiv, Tweens, ungdomsarbeidet og konfirmantane. La dei unge få sjå kven du er, og lei dei på himmelvegen. Styrk familiane, og la heimane vere trygge vegvisarar.
Me ber for Ølensvåg og bygdene omkring. Vekk oss opp, og skap nytt liv og tru mellom oss. Du ser landet og folket vårt. Gi styresmaktene våre visdom og råd, så dei kan styra etter din gode vilje. Me ber spesielt om vern for det ufødde barnet i mors liv og for menneskeverd heilt til livet tar slutt.
Me ber for misjonsarbeidet her heime og i utlandet. Styrk forkynnarar og misjonærar. Kall og utrust nye arbeidarar til teneste i riket ditt. La ordet ditt få framgang ved Den Heilage Ande.
Me ber for alle einsame og sjuke og alle som lir og har det vondt. Me ber for kristne sysken som blir forfølgde for Jesu namns skuld. Me ber for israelsfolket og situasjonen i Midtausten. Skap fred, velsign dei og la folka få sjå Jesus Kristus som sin Messias.
(Me ber spesielt for … eventuelle aktuelle bønneemne.)
Høyr bøna vår, Gud. La namnet ditt bli æra i alt. Amen.
